周四下午澳職獨腳戲，布里斯班獅吼主場迎戰珀斯光輝。獅吼陣中充斥老將，在頻密賽程下體能下滑問題嚴重，近期吃下連場敗仗後信心受挫，不過光輝防線同樣欠佳，今仗兩軍喪攻搶分，有望上演一場入球騷。
獅吼今季簽入意大利老牌前鋒馬卡朗尼，雖然他已年屆38，但其卡士超班，目前已斬獲7個聯賽士哥，威力仍在。只可惜，除了馬卡朗尼，獅吼陣中尚有賓卡法拿、湯馬士基斯甸臣等主力年過三十，難以應付頻密賽程，以致球隊近六仗聯賽只得1勝5負。獅吼主場防守力比作客更差，其中近四仗聯賽更錄得全敗劣績，歸根究底，是獅吼主場出擊往往側重進攻，令防線飽受壓力，以致上述4仗有3次總入球達3球或以上，現時球隊已跌落尾二，為搶分只有繼續喪攻。幸好，獅吼今仗對手光輝近態同樣欠佳，近四仗全敗兼狂失14球，防線猶如豆腐一樣。兩軍近6次常規賽正面交鋒，合共炮製26個士哥，總入球全開3球或以上，既然光輝暫列第7，仍有搶分必要，預計今仗兩軍會再演入球騷。